Vertu með í Vakanum!

Vinsamlegast athugið! Nýtt fyrirkomulag hefur tekið gildi. 

Ferðaþjónusta önnur en gisting - sjá hér 

Gisting - sjá hér  

Vakinn er sérhannað gæða- og umhverfiskerfi fyrir íslenska ferðaþjónustu, en byggir á erlendri fyrirmynd. Þau fyrirtæki sem taka þátt fá óháðan þriðja aðila til að skoða og taka út starfsemi og þjónustu fyrirtækisins, fá staðfestingu á því sem vel er gert og tækifæri til að bæta það sem betur má fara. 

  • Helsti ávinningur af því að taka þátt er:

  • Markviss úttekt byggð á gæðaviðmiðum sem hafa verið samþykkt af sérfræðingum á hverju sviði.

  • Staðfesting á því að fyrirtækið sinni gæða- og umhverfismálum af fagmennsku og heiðarleika.

  • Markaðslegur ávinningur og samkeppnisforskot með viðurkenningu Vakans.

  • Betri rekstur og aukin fagmennska.

  • Auknar líkur á að uppfylla væntingar viðskiptavina.

  • Munum að:

  • Náttúran og orðspor landsins eru það mikilvægasta sem við eigum.

  • Ferðamenn leita frekar til fyrirtækja sem sýna ábyrgð og leggja sitt af mörkum til umhverfis- og samfélagsmála.

  • Gæða-, umhverfis- og öryggismál eru lykilþættir í framtíð íslenskrar ferðaþjónustu.

  • Vakinn er öflugt verkfæri til að auka fagmennsku og gæði í ferðaþjónustu.

  • Merki Vakans er gæðastimpill sem nýtist sem markaðstæki fyrir öll fyrirtæki sem taka þátt.

  • Samkeppnishæfni áfangastaða byggir á mörgum þáttum, svo sem ímynd, gæðum, öryggi og umhverfismálum. Frammistaða fyrirtækja sem taka á móti ferðamönnum hefur áhrif á orðspor Íslands sem ferðamannalands auk þess sem gæðaþjónusta eykur líkur á ánægju viðskiptavina og getur verið leið til þess að skapa fyrirtækjum samkeppnisforskot og sérstöðu á meðal samkeppnisaðila.

  • Það liggja mikil tækifæri í því að auka gæði í íslenskri ferðaþjónustu fyrir áfangastaðinn Ísland. Í því verkefni er Vakinn, gæða- og umhverfiskerfi ferðaþjónustunnar, öflugt verkfæri sem vert er að kynna sér nánar.

  • María Gísladóttir

    Ég er þeirrar skoðunar að það sé hollt fyrir öll fyrirtæki að fara í svona heildstæða naflaskoðun á sínum rekstri og tel að enn einn ávinningurinn sé að maður er undirbúinn fyrir flestar eða allar óvæntar uppákomur sem geta átt sér stað í daglegum rekstri. Manni líður vel eftir úttekt af þessu tagi svona svolítið eins og eftir stórhreingerningu að vori með allt sitt á hreinu.

    María Gísladóttir

    Humarhöfnin

  • Jón Gestur

    Með tilkomu VAKANS er komið fram verkfæri sem stuðlar að auknum gæðum og öryggi í ferðaþjónustu auk þess sem erlendum ferðamönnum gefst tækifæri til að velja viðurkennda ferðaþjónustuaðila út frá samhæfðu kerfi sem staðist hefur úttekt óháðs aðila.

    Jón Gestur Ólafsson

    Bílaleiga Akureyrar - Höldur 

  • Eva María

    Við hjá Pink Iceland ákváðum að vera í VAKANUM því að við vildum vera virkir þátttakendur í uppbyggingu ferðaþjónustu landsins þar sem gæði, umhverfismál, þekking, heiðarleiki, öryggi og siðferði eru höfð að leiðarljósi. Við lítum á VAKANN sem markvisst stýritæki fyrir okkar innri rekstur sem endurspeglast út á við, til gesta okkar og samstarfsaðila.

    Eva María Thorarinsdottir Lange

  • Bjarni Arason

    Mér fannst mjög gott og virkilega fræðandi að fara í gegnum þetta verkefni. Manni verður ljóst hvað þarf að laga og gera betur sem er ákaflega gott mál. Það eru sannkölluð forréttindi að eiga Vakann að.

    Bjarni Arason

    Fosshótel Lind

  • Við fögnuðum því ákaft þegar Gæðakerfið Vakinn var sett á laggirnar. Viðskiptavinir eiga að geta verið vissir um að þeir séu að fá vöru sem uppfyllir kröfur um gæði og öryggi. Gæðavottun Vakans er að mínu mati rétta verkfærið fyrir ferðþjónustuna á Íslandi til þess að sjá til þess að það sé tryggt"

    Tobias Klose

                                                                                      Dive.is

  • Karl Jónsson

    Innleiðingarferli Vakans var frábært tækifæri til að skoða fyrirtækið okkar með utanaðkomandi augum. Vakinn er gott stjórntæki þegar kemur að rekstri og þjónustu við gesti okkar. Stjörnuflokkunin er í raun bónus enda það sem gestir sjá og leita eftir. Í framtíðinni mun gæða-  og stjörnuflokkun skipta sífellt meira máli. Gæði, fagmennska og öryggi  skipta gesti okkar miklu máli og Vakinn rammar það skemmtilega inn. 

    Karl Jónsson - Lamb Inn Öngulstöðum

     

    Umsóknarferli

    Vilt þú taka þátt í Vakanum?

    • Mikilvægt er að undirbúa sig vel með því að fara vandlega yfir gæða- og umhverfisviðmið sem eiga við starfsemi fyrirtækisins.
    • Starfsfólk Vakans veitir upplýsingar um umsóknarferli.

    Gæðaviðmið

    Þú skoðar gæðaviðmiðin

    Fyrir þá sem eru með gistingu:

    • Almenn gæðaviðmið 
    • Viðeigandi gæðaviðmið fyrir hvern gistiflokk.


    Fyrir þá sem eru með ferðaþjónustu aðra en gistingu:

    • Almenn gæðaviðmið
    • Sértæk gæðaviðmið sem eiga við rekstur fyrirtækisins

    Umsókn

    Þú sendir inn umsókn

    Sótt er um þátttöku í Vakanum í þjónustugátt Ferðamálastofu með Íslykli eða rafrænum skilríkjum fyrirtækis. 

    Með umsókn samþykkja forsvarsmenn skilmála Vakans.

    Frá 1. janúar 2019 verða allir þáttttakendur í Vakanum að taka þátt í umhverfishluta og uppfylla að lágmarki skilyrði fyrir brons viðurkenningu. Þeim viðmiðum hefur verið bætt við almenn gæðaviðmið.

    Mikilvægt er að kynna sér nánari upplýsingar um umsóknarferlið.

    Ýmis gögn

    HVAÐA GÖGN ÞURFA AÐ VERA TIL?

    Í almennum gæðaviðmiðum eru talin upp ýmis gögn sem þurfa að vera til hjá þátttakendum í Vakanum. Dæmi um nauðsynleg gögn sem þarf að senda inn til skoðunar-/vottunarstofu:

    • Gæðahandbók/starfsmannahandbók
    • Öryggisáætlanir
    • Opinber leyfi sem eiga við reksturinn t.d. frá Ferðamálastofu, Samgöngustofu, Sýslumannsembætti, o.fl.
    • Nafnalisti starfsmanna/leiðsögumanna með yfirliti um námskeið sem þeir hafa lokið t.d. skyndihjálparnámskeið.
    • Afrit af ráðningarsamningi starfsmanns án persónuupplýsinga.
    • Staðfesting á því að ábyrgðartrygging sé í gildi.
    • Sjá nánar hér fyrir ferðaþjónustu aðra en gistingu.
    • Sjá nánar hér fyrir gistingu.

    Úttekt

    Úttekt hjá skoðunar-/vottunarstofu

    Úttekt skiptist í tvö þrep; skoðun á gögnum og vettvangsheimsókn. Umsækjandi þarf að senda tiltekin gögn til úttektarfyrirtækis. Þau almennu gæðaviðmið sem eru stjörnumerkt fela í sér að senda þurfi gögn. Ef úttektaraðili metur öll nauðsynleg gögn sem fullnægjandi getur fyrirtækið í kjölfarið fengið viðurkenningu Vakans. Innan þriggja mánaða mun svo fara fram vettvangsheimsókn hjá viðkomandi fyrirtæki þar sem kannað er hvort að starfsemin sé í samræmi við skrifleg gögn.

    Ef um gistingu er að ræða á vettvangsheimsókn sér stað innan tveggja mánaða. Annað fyrirkomulag gildir þó fyrir hótel sem sjá má annars staðar á síðunni.

     

    Flokkun

    Viðurkenning Vakans

    Ferðaþjónusta önnur en gisting:

    Uppfylla þarf öll almenn og viðeigandi sértæk gæðaviðmið til þess að fá viðurkenningu Vakans.

    Gisting:

    Uppfylla þarf öll almenn og viðeigandi gæðaviðmið fyrir hvern gistiflokk til þess að fá viðurkenningu Vakans.

    Stjörnuflokkun býðst fyrir þriggja til fimm stjörnu hótel en aðrar tegundir gistingar fá viðurkenningu (viðurkennt gistiheimili, viðurkennt hostel o.s.frv.).

     

    Fleiri fréttir